logo3.gif (702 bytes)

HOME


අබිරහස්‌ පරිත්‍යාග

අපට තවත් බාධක රාශියකට මුහුණ දෙන්න වුණා. එකක්‌ තමයි අපි කොහොම ද අපිට ලැබෙන්න ඉන්නේ පුතෙක්‌ බවටත්, ඒ පුතා ගේ ඇස්‌ නිල් පැහැ බවටත් තීරණය කරන්නේ කියන එක. මීට පිළියමක්‌ විදියට, අපි x, y ජාන සහිත අපේ ජන්මාණු සෛල දෙකක්‌ විද්‍යාගාරයක කෘත්‍රිම ව සංසේචනය කරලා, ඒ කලලයේ දැස්‌වල වර්ණය නිල් පාට වන විදියට ජාන වෙනස්‌ කළා. ඊළඟට ප්‍රශ්නය වුණේ, මම ප්‍රසිද්ධ නිසා, මගේ බිරිඳ ගර්භණී වුණා ම, මේක කාටත් පුවතක්‌ වේ වි. ඒ වගේ ම, උපදින පළමු දරුවා අභිරහස්‌ විදියට අතුරුදන් වුණා ම, ඒක ඊට වඩා ලොකු පුවතක්‌ වේ වි. ඒකට පිළියමක්‌ විදියට, අර සංසේචිත ඩිම්බය අපි දෙකට කඩලා, කලල දෙකක්‌ විදියට ඔයා ගේ අම්ම ගේ ගර්භාෂයේ තැන්පත් කළා. එයින් සම නිවුන් පුතුන් හැදුණා. එයින් පළමුව ඉපදුණු පුතාව අපි දන් දුන්නා. ඔයා එතන දැක්‌කේ එයා තමයි අනෙක්‌ පුතා තමයි ඔයා"

ජොෂුවා මුව අයාගෙන පුදුමයෙන් අසා සිටියේ ය. ඔහුට සිය අවාසනාවන්ත නිවුන් සොහොයුරා ගැන වාවාගත නොහැකි දුකක්‌ ඇති විණි.

"ඒ විතරක්‌ නො වෙයි ජොෂුවා, මේ වේච්ච ව්‍යසනය නිසා මට පිස්‌සු හැදෙන්න වගේ ආවා. මාව සනසවන්න ඔයා ගෙ අම්මත් මගේ එක ම සහෝදරයත් ගොඩක්‌ උත්සාහ දැරුවා. මගේ සහෝදරයා ඔයාව හදා වඩාගන්න පොරොන්දු වෙලා ඔයා වෙනුවෙන් ලොකු කැප කිරීමක්‌ කළා. එයා ප්ලාස්‌ටික්‌ සැත්කමකින් මුහුණ වෙනස්‌ කරගෙන, වෙන නමකින් පෙනී සිටිමින්, ඔයාට නො දැනෙන්න ඔයාව හොඳින් බලාගත්තා. ලෝකයා හිතන්නේ එයා හදිසියේ ම අතුරුදන් වුණා කියලා. ඒත් එයා අදටත් අපි එක්‌ක ඉන්නවා. තව දෙයක්‌, මම ඔයා ගේ නිවුන් සහෝදරයව පිග්මි මිනිසුන්ට භාර දෙන්න ගිය වෙලාවෙ දී, ඒ අය මට කිව්වා, එයාට අවුරුදු 18ක්‌ පිරුණු දවසට එයාව බිලි පූජාවක්‌ විදියට ඔප්පු කරන බව. මම කැමැති නම්, එයාව අවසාන වතාවට දැකබලාගන්න එදාට එන්න පුළුවන් බව ඒ අය කිව්වා. නමුත් ඊට කලින් මම පැමිණියොත්, එයා වත් මාවත් මරණ බවට ඔවුන් තර්ජනය කළා. ජොෂුවා, ඔයාට අද අවුරුදු 18යි නේ. එයාව බලාගන්න තමයි අපි මෙහේ ආවේ."

ජොෂුවා කල්පනා කරන්නට විණි. ඔහු සිය දැතෙහි වූ රබර් පටියෙන් තමන්ට ඉදිරියෙන් වූ ගසක කඳට කොළ විද්දේ ය. ඔහු ගේ මනස ව්‍යාකූල තත්ත්වයක පැවතිණි.

"මගේ නිවුන් සහෝදරයා..... පව්..... එයා මම වෙනුවෙන් නේ ද මේ තරම් කැප කිරීමක්‌ කළේ? අපිට එයාව බේරගන්න බැරි ද? එයා ගේ ඇඟේ තාමත් උණුසුම තියනවා. මම හිතන්නේ නැහැ එයා මැරිලා කියලා."

"ඔව්, මමත් මෙහෙ ආවේ එයා ගේ නිසල සිරුර දැකීමේ බලාපොරොත්තුවෙන්. ඒaත් මටත් හිතෙනවා අපිට එයාව පණ පිටින් ගෙදර ගෙනියන්න පුළුවන් වේ වි කියලා. මට එහෙම දෙයක්‌, අපිට උමඟ තුළ මඟ පෙන්වපු පිග්මි මිනිහා හොර රහසින් සැළ කළා. ඒත් ඒක වෙන්නේ කොහොම ද කියලා එයා කීවේ නැහැ. එයා ඔයා ගේ සහෝදරයාව ගොඩක්‌ වර්ණනා කළා. ඔයා ගේ සහෝදරයා ගේ ගෝත්‍රික නම කෝහට්‌ ලු. කෝහට්‌ තරමක්‌ ලොකු වෙනකොට, එයා අනෙක්‌ අයට වඩා වෙනස්‌ බව නිරීක්‌ෂණය කරලා, තමන් ගේ සම්භවය ගැන අහලා තියෙනවා. මුල දී එයාට කවුරු වත් පිළිතුරු දීලා නැහැ. නමුත් පස්‌සේ, අපට අර පාර පෙන්වපු පිග්මි මිනිහා, මගේ පුතාට අනුකම්පා කරලා එයාට ළං වෙලා තියෙනවා. එයා කියා තියෙන්නේ, මගේ පුතා ඔවුන් බලාපොරොත්තුවෙන් හිටිය දේව දූතයා බවත්, ඔවුන්ට අහස්‌ දිය සහ ආලෝකය ලබා දීම ඔහු ගේ දේව කාර්යය බවත්, ඒ කාරණා සාක්‌ෂාත් කළාට පස්‌සේ ඔහුට ගැලවීම ලැබෙන බවත් විතරයි. ඒ අනුව ක්‍රියාත්මක වුණු ඔයා ගේ නිවුන් සහෝදරයා, ඔහු ගේ බුද්ධියත් නිර්මාණාත්මක හැකියාවත් පාවිච්චි කරලා, ස්‌වාභාවික ආලෝකය ලබාගන්න ශාක රෙසිනවලින් පාරගම්‍ය පැතලි තැටි හදලා තියෙනවා. ඒ වගේ ම, අපිට මේ ඉහළින් ඇහෙන කුඩා දිය ඇල්ලේ දිය දහරාවත්, ශාක කඳන්වල හාරපු බට මාර්ගයෙන් පිග්මි කුහුඹු ගුල ඇතුළට හරවා තිබෙනවා. එයින් ඇතුළට

රැස්‌ වන වතුර, ඇතුළේ නො රැඳී නැවතත් පිටතට යැම සඳහා විශේෂ කාණු පද්ධතියක්‌ පවා සකස්‌ කර තියෙනවා. අපි උමං තුළ නිරීක්‌ෂණය කරපු මේ නිර්මාණය එයා ගේ. ඒ වාගේ ම එයා විවිධ මාදිලියේ වැඩිදියුණු කළ ආයුධ හදා දීලා තියෙනවා. මම මුල දී මේ ගුලට වැටුණම එතැන තිබුණේ අඳුරු පරිසරයක්‌. නමුත් අද ඒක සුදු ආලෝකය සහිත හුළු අතුවලින් ආලෝකවත් වෙලා තියෙනවා. ඒකත් එයා ගේ නිර්මාණයක්‌."

ඩේවිඩ් ඈත බලාගෙන දිගු සුසුමක්‌ ලෑවේ ය. "ඔයා දන්නව ද ජොෂුවා, එයත් ඔයා වගේ තාරකා පිස්‌සෙක්‌ ලු. හවසට, රාත්‍රියට ගස්‌ උඩට වෙලා තාරකා රාශි අධ්‍යයනය කිරීම එයා ගේ විනෝදංශයක්‌ ලු. තමන්ට ගෝචර වන විදියට රාත්‍රි අහස පිග්මි අක්‌ෂර අනුසාරයෙන් එයා සිතියම්ගත කර තිබෙනවා. පව්...... මොන තරම් දීප්තිමත් අනාගතයක්‌ තියෙන්න තිබ්බ දරුවෙක්‌ ද? මගේ වරදින් තමයි මේ හැම දෙයක්‌ ම සිද්ධ වුණේ. මම කවදා වත් මට සමාව දෙන්නේ නැහැ."

ජෙෂුවා ගේ දැස්‌ කඳුළින් තෙත් විය. තමන් වෙනුවෙන් මෙතරම් පරිත්‍යාගයක්‌ කළ තම නිවුන් සොහොයුරා ගැන ඔහුට මහත් දුකක්‌ ඇති විය. මේ වෙනස තීරණය වුණේ, ඔහු තමන්ට වඩා විනාඩි කිහිපයකට ප්‍රථමයෙන් මෙලොව එළිය දුටු නිසා නො වේ ද? එදා පටන් ඔහු අඳුරු ගුහාවකට සිර වී කටුක, නීරස ජීවිතයක්‌ ගත කරන්නට ඇති. නමුත් තමන්..... සියලු සැප සම්පත්වලින් හෙබි, ලොව සුපිරි ම රටේ, සුඛෝපබෝගී ජීවිතයක්‌ ගත කර තිබේ.

"ඇයි අපි මෙතන ඉන්නේ?" ඔහු සෙමින් අහක බලාගෙන ඇසී ය.

"අර පිග්මි ගෝත්‍රිකයා, මගෙ පුතා ගේ දක්‌ෂකම්, ධෛර්යය, ජීවත් වීමට ඇති ආශාව දැකලා, එයා ගැන අනුකම්පා කරලා, එයාට අත් වෙන්නට යන ඉරණම සැළ කරලා තියෙනවා. ඒ විතරක්‌ නො වෙයි, අනෙක්‌ පිග්මි මිනිසුන්ට නො දැනෙන විදියට ඔහුව එයින් මුදවාගන්නටත් දෙන්නා සැලසුමක්‌ හදලා තියෙනවා. ඒකයි අපි මෙතන ඉන්නේ."

මේ අතරතුර, ගුහාව ඇතුළත අමුතු ජවනිකාවක්‌ දිගහැරෙමින් පැවතිණි. නිසල ව සිටි "දේව දූතයා" හදිසියේ ම දැස්‌ හැර, ලී මැස්‌ස උඩ හිඳගත්තේ ය. ඉන් පසුව බැරෑරුම් මුහුණක්‌ මවා පෑ ඔහු, මැස්‌ස උඩ හිටගෙන, කුහුඹු ප්‍රතිමාවට දෙඅත් එක්‌කොට වැඳ නමස්‌කාර කළේ ය. මේ අතර පිග්මි ගෝත්‍රිකයෝ, දේවදූතයා මරණින් නැඟිට ඇතැයි සිතා, බෙහෙවින් බියට පත් වී, ඔහුට නමස්‌කාර කිරීමට පටන් ගත් හ. අවස්‌ථාවෙන් ප්‍රයෝජන ගත් දූතයා, කුහුඹු ප්‍රතිමාවේ රහසිගත ස්‌ථානයක සඟවා තිබූ කුඩා පාර්සලයක්‌ ගෙන, එහි අන්තර්ගත කුඩු වර්ගයක්‌ පිග්මි මිනිසුන් වෙත භක්‌තියෙන් ඉසී ය. ඔවුහු සැණෙකින් මත් වී, එක්‌කෙනා දෙන්නා නින්දට වැටෙන්නට විය. එම කුඩු වර්ගයේ බලපෑම පැය කිහිපයක්‌ යන තෙක්‌ රැඳෙනු ඇතැයි ඔහු දැන සිටියේ ය. ඉන්පසුව, දූතයා මැස්‌ස උඩ සිටගනිමින්, උතුරු සිදුර තුළ පෙර අවස්‌ථාවක රහසින් සවි කළ කඹයක්‌ මාර්ගයෙන් මතුපිටට පැමිණියේ ය. ඔහු වේගයෙන් දිව ගොස්‌ ජොෂුවා සහ ඩේවිඩ් සිටි තැන හදිසියේ ම නතර විය. ඔවුහු දෙදෙනා ම කෙළින් වී හිඳ ගත් හ. ඔවුන් තිදෙනා මුව අයා එකිනෙක දෙස මාරුවෙන් මාරුවට බැලූ හ. මුලින් ම කටහඩ අවදි කළේ කෝහට්‌ ය. ඔහු ගෝත්‍රික භාෂාවන් ඩේවිඩ්ට යමක්‌ කී ය. ඩේවිඩ් ප්‍රීතියෙන් ඉදිරියට පැන සිය පුත්‍රයා සිය වැළඳගත්තේ ය. ජොෂුවා දෙසට හැරුණු ඩේවිඩ්, "මෙයාට අපිත් එක්‌ක ගෙදර එන්න අවශ්‍යයි ලු" යෑයි උද්දාමයෙන් පැවසී ය. ඩේවිඩ්, ජොෂුවා සහ කෝහට්‌ එකිනෙකාට හඳුන්වා දුනි. උපතින් වෙන් වුණු නිවුන් සොහොයුරන් නැවත හමු වූයේ අවුරුදු 18 කට පසු ව ය

ජොෂුවා ඔහු ගේ ගමන් මල්ලෙන් ඇඳුමක්‌ සිය සොහොයුරාට ප්‍රදානය කළ ද, ඔහු එය ප්‍රතික්‌ෂේප කළේ ය. කෝහට්‌ ගේ අතෙහි වූ රෝලක්‌ සහ කුඩා කැටපෝලයක්‌ ඇස ගැටුණු ජොෂුවා, ඒවා මොනවා දැයි සිය පියා මාර්ගයෙන් විමසී ය. ඔහු රෝල දිග හැර පෙන්වී ය. එය ගස්‌වල පොතුවලින් සාදා තිබුණු අතර, බලි කුරුටු මෙන් එහි තාරකා සිතියම් රාශියක්‌ විය. එය දුටු ජොෂුවාට, සිය ටැබ්ලොයිඩ් පරිගණකයත් නාසා ආයතනයත් සිහිපත් විය. ඔහුට සිය සොහොයුරා ගැන දැඩි කම්පාවක්‌ ඇති විය. කැටපෝලය ගැන විමසූ ඩේවිඩ්, සිනාසෙමින්, "මම කීවේ ජොෂුවා, මෙයා ඔයා වගේ මයි. ඔයා කල්පනා කරන කොට රබර් පටියෙන් කඩදාසි කොළ ප්‍රක්‌ෂේපණය කරනවා නේ. කෝහට්‌ ඒ ආකාරයන් ම කුඩා කැටපෝලයකින් ගස්‌වල කොළ ප්‍රක්‌ෂේපණය කරනවා." ඩේවිඩ් සිනාසිණි. ජොෂුවා සිය දැතෙහි පටලැවී තිබූ රබර් පටිය අඹරවමින් සිහින් සිනාවක්‌ නැඟී ය.

"කෝහට්‌, විෂකුරු සර්පයා දෂ්ට කළ එකෙන් බේරිලා තියෙන්නේ කොහොම ද?" ජෙෂුවා කෝහට්‌ ගේ කලවා ප්‍රදේශයේ වූ දළ පහරවල් පෙන්වමින් පියා ගෙන් විමසී ය.

"එයා ගේ පිග්මි මිත්‍රයා විෂකුරු සර්පයා දෂ්ඨ කිරීමට කලින් උගේ විෂ ඉවත් කරලා." ඩේවිඩ් පැවසී ය.

කෝහට්‌ ඉතා ප්‍රීතියෙන් සිය පියා සහ සොහොයුරා සමඟ ඔහු ගේ නිවස බලා පිටත් විය.

නිවසට ළඟා වූ ඔහුට සිය මව ගෙන් ලැබුණේ උණුසුම් පිළිගැනීමකි.

දින දෙකකින් පසුව, ජොෂුවා, නාසා ආයතනයේ කවුළුවක්‌ අසල බර කල්පනාවක නිමග්න ව සිටගෙන සිටියේ ය. අවට රෑ බෝ වෙමින් පැවතිණි. ඔහු ඈත අහස දිහා හිස්‌ බැල්මක්‌ හෙළී ය. ඔහු ගේ අතෙහි සුපුරුදු රබර් පටිය වෙනුවට සිය සොහොයුරා ගේ කැටපෝලය රැඳී තිබිණි.

"ජොෂුවා ගෙදර යන්න කල්පනාවක්‌ නැද්ද?" මහාචාර්ය එලන් පැට්‌රික්‌ ගේ කටහඩින් ජොෂුවා තිගැස්‌සිණි.

"ම්... මහාචාර්යතුමා, මගෙන් හේතුව අහන්නේ නැතුව මට ලොකු උදව්වක්‌ කරන්න පුළුවන් ද?" ජොෂුවා බැගෑපත් විය.

"මොකද්ද?" මහාචාර්යවරයා නළල රැළි කරගනිමින් විමසී ය.

"අනිද්දට විවෘත කරන්න නියමිත මගේ අභ්‍යවකාශ මධ්‍යස්‌ථානය, අන්තර්ජාතික ජොෂුවා සැම්සන් මධ්‍යස්‌ථානය වෙනුවට අන්තර්ජාතික කෝහට්‌ මධ්‍යස්‌ථානය කියලා නම් කරන්න මට පුළුවන් ද? අනේ කරුණාකරලා හේතුව නම් අහන්න එපා."

මහාචාර්ය එලන් ජොෂුවාට ළං ව, ඈත අහස දිහා බැලී ය. "ඔයා ගේ කැමැත්තක්‌," ඔහු සෙමින් පැවසී ය. "එහෙනම් ඒකයි ඔයා ගේ සහෝදරයා ගේ ගෝත්‍රික නම" ඔහු දිගු නිහැඩියාවකින් පසුව පැවසී ය.

"එහෙනම් ඔබයි මගේ පියා ගේ අභිරහස්‌ සහෝදරයා?"

ජොෂුවා කී ය. මහාචාර්යවරයා පිළිතුරු නො දුනි.

ඔවුහු දෙදෙන ම ඈත අහස දෙස්‌ හිස්‌ බැල්මෙන් යුතු ව බලා සිටිය හ.

"අභිරහස්‌ පරිත්‍යාග" ජොෂුවා සෙමින් මිමිණී ය.

නිමාෂි ප්‍රනාන්දු

නිමි

ඔබේ අදහස්‌, යෝජනා sci.fix100@gmail.com ලිපිනයට යොමු කරන්න