logo6.gif (686 bytes)

arrow7.gif (1098 bytes)


2012 A/L EXPRESS BIOLOGY
නිබන්ධන මංකොල්ලය


විදුසර ජාතික විද්‍යා ප්‍රකාශනය තුළින් A/L EXPRESS යටතේ, අප ඉදිරිපත් කළ නිබන්ධන පාඨමාලාවේ අවසානයට, ශීඝ්‍ර පුනරීක්‌ෂණ අත්වැල 1 හා 2 නිර්මාණය කොට දෙසතියක්‌ තුළ දී ඉදිරිපත් කෙරිණි.

අප පංතිවලට සහභාගී වන, ගවේෂණශීලී සිසු පිරිසකට, පසුගිය දින කිහිපය තුළ කොළඹ හා ගම්පහ දිස්‌ත්‍රික්‌කවල තැපැල් මගින් බෙදා හරිණු ජීව විද්‍යා නිබන්ධනයක්‌ දැකගත හැකි විය. විභාගයට ආසන්න වෙමින් ගලා යන තම වටිනා පුනරීක්‌ෂණ කාලය ද වැය කරමින් ඔවුහු මානව ග්‍රවණාගාරයට පැමිණ එම නිබන්ධනය මට බාර දුන් හ. (පංති අවසන් කොට ඇති වකවානුවක, ඔවුහු එය රැගෙන ආ හ).

බෞද්ධ සාහිත්‍යයේ එන සිටු දියණියක ගේ පිය සිටුවරයා ගේ නාම උච්චාරණයට කිට්‌ටු නාමයක්‌ නිබන්ධනයේ මුද්‍රණය වී තිබිණි.

මහා දිගු කතාවක්‌ කෙටියෙන් පවසතොත්, 2012 ජූලි 25 විදුසර පත්‍රයේ ජීව විද්‍යා ශීඝ්‍ර පුනරීක්‌ෂණ අත්වැල - අංක 1, ඡායා පිටපතක්‌ ලබා ගන්නා ආකාරයට සොරාගෙන, තමන් ගේ නාමය ඊට යොදා නැවත මුද්‍රණය කොට, බෙදාහැර ඇත.

එම පුනරීක්‌ෂණ අත්වැලෙහි, ආරම්භයේ දී අප සිසුනට විශේෂ උපදෙසක්‌ දී තිබිණි. එම උපදෙසෙහි අවසන් ඡේදය මෙසේ ය.

''මේ පුනරීක්‌ෂණයේ දී, මෙහි ස`දහන් ප්‍රශ්න හොඳින් කියවා, පිළිතුරු සිතීම ප්‍රමාණවත් ය. පිළිතුරු ලිවීමකට කාලය වැය කළ යුතු නැත. අසීරු යමක්‌ වේ නම්, ඔබ සතු පොත් පත්, ලිsපි ලේඛන ඇසුරෙන් එවෙලෙහි ම පිළිතුරට යොමු වීම වැදගත් ය. මෙය අවසන් පුනරීක්‌ෂණයට ප්‍රබල අත්වැලක්‌ වනු ඇත.''

මේ ඡේදය ද, ඉස්‌පිල්ලක්‌, පාපිල්ලක්‌ අඩුවක්‌ නොමැති ව ගුරු වෙස්‌ ගත් චෞරයා විසින් ඩැහැගනු ලැබ ඇත. එම නිබන්ධනයෙන් සොරා ගත් ප්‍රශ්නවලින් ඔහු ගේ නිබන්ධනයේ මුල පිටුව මුළුමනින් ම ද, 2 වැනි පිටුවේ අඩක්‌ ද පිරී ඇත. ප්‍රශ්න සොරකම් කොට ඇත්තේ ද, ඡායා පිටපතක්‌ ලබා ගන්නා ආකාරයට අකුරක්‌ වත් වෙනස්‌ නො වන පරිදි ය.

පුනරීක්‌ෂණ අත්වැල අංක 1න්, ඩැහැගත් ප්‍රශ්නයන් හි අංක මෙසේ ය.

1) ප්‍රශ්නය - ෂෂ කොටස

2) ප්‍රශ්නය - I, II, III කොටස්‌

3) ප්‍රශ්නය - I කොටස

6) ප්‍රශ්නය - II (a කොටස)

7) ප්‍රශ්නය - III, IV කොටස්‌

9) ප්‍රශ්නය - 2 වැනි කොටස

11) ප්‍රශ්නය - 3 වැනි කොටස

14) ප්‍රශ්නය - 1 - C කොටස,II කොටස

15) ප්‍රශ්නය - I, II කොටස්‌

17) ප්‍රශ්නය - I, II කොටස්‌

18) ප්‍රශ්නය - II කොටස, III කොටස a, b, c

19) ප්‍රශ්නය - II - 2 කොටස, III කොටස, V කොටස

20) ප්‍රශ්නය C කොටස I හා II

21) ප්‍රශ්නය - I, IIහි a,b,c,d කොටස්‌

23) ප්‍රශ්නය I කොටස a හා b

24) ප්‍රශ්නය I වැනි කොටස

25) ප්‍රශ්නය I කොටස, III කොටස හා V කොටස



ප්‍රශ්න 25කින් සමන්විත අප ගේ ශීඝ්‍ර පුනරීක්‍ෂණ අත්වැල අංක 1හි ප්‍රශ්න, කිසිදු වෙනසකින් තොර ව, ගුරු වෙස්‌ ගත් චෞරයා විසින් පැහැරගනු ලැබ ඇත්තේ එපරිද්දෙනි.

විදුසර ජාතික විද්‍යා ප්‍රකාශනය සඳහා මා අතින් ලියෑවෙන "මිහිතලයේ යටගියාව" මෙන්ම, ජීව විද්‍යා පුනරීක්‍ෂණ නිබන්ධන ද නිර්මාණාත්මකව ඉදිරිපත් කිරීම මාගේ බලාපොරොත්තුවයි. ජීව විද්‍යා පුනරීක්‍ෂණ නිබන්ධන යටතේ, සිද්ධාන්ත ගොඩවල්, අත්පොත්, හා ගුරු අත්පොත්වලින් උපුටා ගොඩ ගැසීම වෙනුවට බහුවරණ විශ්ලේෂණ,T/F නිබන්ධන රචනා පුහුණුව, ව්‍යුහග රචනා පුහුණුව, "OLD IS GOLD" ශීඝ්‍ර පුනරීක්‍ෂණ අත්වැල ආදී ස්‌වරූපවලින් ඒවා ඉදිරිපත් කළෙමි.

මේ තත්ත්ව යටතේ ගුරු චෞරයා සිදු කොට ඇත්තේ, බුද්ධිමය දේපල සොරා ගැනීමකි. විදුසර ජාතික විද්‍යා ප්‍රකාශනයේ අවසරයකින් තොර ව, සොරාගෙන නැවත මුද්‍රණය කොට පිටපත් බෙදාහැර ඇත. විෂය දැනුමෙන් සන්නද්ධ ව, අභිමානවත් ව සිසුන් ඉදිරියේ සිටිය යුතු ගුරුවරයා නිබන්ධන චෞරයකු බවට පත් වීම ඛේදවාචකයකි. මෙය මුදල පසුපස හඹා යන, සුනඛ පොර පිරි සමාජයක යථාර්ථය නිරූපනය කරන තවත් එක්‌ අවස්‌ථාවක්‌ ලෙස සැලකිය හැකි ය. හරවත් ව ප්‍රශ්නයක්‌ නිර්මාණය කිරීම තබා, උපදෙස්‌ වැකියක්‌ වත් නිර්මාණය කරගත නොහැකි තරමට බංකොලොත් වූ ගුරු චෞරයන් ඒ පිළිබඳව විස්‌තර ඇතොත් සාක්‍ෂි සහිතව මානව ශ්‍රවණාගාරය වෙත යොමු කරන මෙන් ඉල්ලා සිටිමි.

මේ බුද්ධිමය දේපල මංකොල්ලයට එරෙහි ව සාධාරණයක්‌ පතා නීති උපදෙස්‌ ගැනීම් මේ වන විට සිදු වෙමින් පවතී. දින කීපයක්‌ එක දිගට මහන්සි වී විභාගය ඉලක්‌ක කොට නිර්මාණය කොට, ජාතික ප්‍රකාශනයක පළ කළ නිබන්ධනයක්‌ ඉතා ම කෙටි කාලයක්‌ තුළ දී මහ දවල් අමු අමුවේ ඩැහැ ගැනීම නිසා ඇති වුණු මානසික කැළඹුම විදුසර ප්‍රබුද්ධ පාඨකයන් හා එක්‌ ව තුනී කර ගැනීම උදෙසාත් මෙවැනි ගුරු වෙස්‌ ගත් චෞරයන් හඳුන්වා දීම සඳහාත් මෙය මෙසේ ලියෑවිණි.

මෙවැන්නන් හඳුනා ගැනීම, අධිශ්ඨානශීලී ප්‍රබුද්ධ සිසු පරපුරේ අවශ්‍යතාවක්‌ ද වේ.

අසංග අබේසුන්දර (B.Sc)
මානව ශ්‍රවණාගාරය
223. විජය කුමාරතුංග මාවත, කොළඹ 05
manawaauditorium@gmail.com