logo3.gif (702 bytes)

arrow7.gif (1098 bytes)


දෙවියන් මිනිස්‌ ලෝකයේ කරන මැදිහත්වීම්

දෙවියන් හා භූතයන් ගැන කීමට තවත් බොහෝ දේ ඇති නමුත් මෙහි දී ප්‍රධාන වශයෙන් ම ඔවුන් ගැන කියෑවෙන්නේ අප දැනුම ලබාගන්නා එක්‌ මානයක්‌ ලෙස ඔවුන් වැදගත් වන බැවිනි. මට දැනගන්නට ලැබුණු තවත් තොරතුරු අනුව එක්‌වර භුතයන් කිහිප දෙනකුට වුව ද මිනිසකුට ආරූඪ වීමට හැකි ය. එක්‌ භූතයකු එක්‌ අවයවයකට ද තවත් භුතයකු තවත් අවයවයකට ද ආදී වශයෙන් එහි දී ආරූඪ වීම සිදු වෙයි. භුතයන් ගෙන් ද අපට දැනුම ලබාගත හැකි ය. එහෙත් ඇතැම් විට මේ දැනුම් වැරැදි විය හැකි බව ද තේරුම් ගත යුතු ය.

ඇතැම් භුතයෝ හිතා මතා ම අප නොමඟ යවති. එනේ ම මිථ්‍යාදෘෂ්ටික දෙවිවරු ද අපට වැරැදි තොරතුරු ලබා දෙති. එසේත් නැත හොත් ඔවුහු තමන් ගේ අධර්මයට සරිලන අන්දමට ඒ සමඟ එකඟ වන දැනුම් අපට ලබා දෙති. මේ සියලු දැනුම් සම්බන්ධයෙන් අපට එක්‌ පරීක්‍ෂණයක්‌ යොදාගත හැකි ය. ඔවුන් අපට ලබා දෙන දැනුම අවසානයේ දී නිවන් දැකීම සමඟ, තණ්‌හාව තුනී කිරීම සමඟ, මමත්වය, අහංකාරය තුනී කිරීම ආදිය සමඟ කෙතරම් දුරට එකඟ වන්නේ ද යන්න ඒ පරීක්‍ෂණයේ දී අප ඇසිය යුතු මූලික ප්‍රශ්නයක්‌ වෙයි. අඩු ම තරමින් ඒ සමඟ එකඟ වීම කෙසේ වෙතත් එයට විරුද්ධ ව නො යන බවට අපට සහතිකයක්‌ තිබිය යුතු ය.

අපේ දැනුම අප පමණක්‌ නො ව වෙනත් අදෘශ්‍යමාන ප්‍රාණීන් ද එකතු කරගෙන ගොඩනඟන්නකි. මෙය සිංහල බෞද්ධ සංස්‌කෘතියට පමණක්‌ නො ව වෙනත් සංස්‌කෘතීන්ට ද පොදු වූවකි. පහළොස්‌වැනි සියවසේ අගභාගයේ පමණ සිට මිථ්‍යාදෘෂ්ටික දෙවිවරුන් ගේ බලවත් වීමක්‌ සිදු වී ඇත. ඔවුන් ගේ ද ආධාරයෙන් බටහිර රටවල ගොඩ නැඟුණු දැනුම හේතුවෙන් අද ලෝකය (ස්‌වභාවධර්මය) සූරාකෑමට ලක්‌ වී ඇත. මේ සූරා කෑම සිදු වන්නේ ලෝකපාළුවන් ගේ ආධාරයෙනි. බටහිරයෝ ලෝකපාළුවෝ වෙති. ඔවුහු අද ලෝකය පාලනය කරති. ඔවුනට පසුගිය අවුරුදු පන් සියයකට අධික කාලයක්‌ තිස්‌සේ මිථ්‍යාදෘෂ්ටික දෙවියන් ගේ හා භූතයන් ගේ ආධාරය ලැබී ඇත.

අද බටහිර ලෝකය විසින් නිර්මාණය කෙරෙන දැනුම කිසිසේත් ම නිවන් අවබෝධ කිරීමට තුඩු නො දෙන්නක්‌ බව පඬියන්ට හැරෙන්නට අනෙක්‌ අයට අවබෝධ වන කරුණකි. එය නිවන් අවබෝධය සඳහා නො ව නිවනෙන් ඈත් කිරීම සඳහා වූවකි. ඉන්ද්‍රිය පිනවීම, මමත්වය වර්ධනය කිරීම, සාමූහිකත්වයෙන් ඈත් කිරීම, වියුක්‌තය හා ඉන්ද්‍රිය ගෝචර ප්‍රත්‍යක්‍ෂය ඉතා ඉහළින් සැලකීම ආදිය බටහිර දැනුමේ පදනමේ ම වෙයි. ඒ අතර මිනිසා ස්‌වභාවධර්මය ගසා කෑම ද වෙයි. ස්‌වභාවධර්මය ගසා කෑම මත පදනම් වූ දැනුමක්‌ පරිසරය රැකීම සඳහා උපයෝගී කරගත නො හැකි බව බටහිර උගතුන්ට තේරුම් ගත නො හැකි ය. ඒ බව මෙරට සිටින පඬියන්ට නම් කිසිසේත් ම තේරුම්ගත නො හැකි ය.

පරිසරය රැකීම, පරිසර සංරක්‍ෂණය, කළමනාකරණය ආදිය බටහිරයන් තනා ඇති ව්‍යාජ වචන පමණකි. මමත්වය ඉස්‌මතු කරන, හැකිතාක්‌ ඉන්ද්‍රිය පිනවීමට මිනිසුන් පොලඹවන සංස්‌කෘතියක, පරිසරය රැකීම යන්න ද තවත් ආදායම් මාර්ගයක්‌ නිර්මාණය කිරීම වැළැක්‌විය නො හැකි ය. අද පරිසරය රැකීම හා අදාළ මාතෘකා ගැන ලියෑවෙන ලිපි නො ලියන්නේ නම් ඒ සඳහා කඩදාසි තැනීමට කපන ගස්‌ කිහිපයක්‌ වත් රැකෙනු ඇත. පරිසර සම්මේලන පැවැත්වීම ඊනියා විද්‍යාඥයන්ට පමණක්‌ නො ව තරු තුනේ හතරේ හෝටල්වලට ද ආදායම් මාර්ගයක්‌ වී ඇත. මෙරට සිටින කසිකබල් බටහිර විද්‍යාඥයන් පරිසර වැඩමුළු ආදිය පැවැත්වීමෙන් වැඩක්‌ සිදු වී ඇත්තේ පරිසරයට ද නැත්නම් ඔවුන් ගේ බැංකු ගිණුම්වලට ද යන්න අමුතුවෙන් සොයා බැලිය යුතු කරුණක්‌ නො වේ.

මට දෙවියන් හෝ භූතයන් හෝ ගැන සෘජු අත්දැකීමක්‌ නැත. මා දෙවියන් ගෙන් දැනුම ලබාගෙන ඇත. එහෙත් ඒ වක්‍ර ව වෙනත් අය ගේ මාර්ගයෙනි. මට අදෘශ්‍යමාන දෙවියන් විශ්වාස කිරීම කිසි ම ගැටලුවක්‌ නැත. එයට හේතුව කිහිප දෙනකු ම දෙවියන් දැක තිබීම පමණක්‌ නො ව දෙවියන් ගේ ආධාරයෙන් රෝග විනිශ්චය කර සාර්ථක ප්‍රතිකාර ද නියම කර තිබීම ය. කෙසේ වුවත් මෙරට පඬියන්ට හුදෙක්‌ සම්මුතියක්‌ පමණක්‌ වූ ද ඉන්ද්‍රිය ගෝචර නො වූ සංකල්පයක්‌ වූ ගුරුත්වාකර්ෂණ බලය පිළිගත හැක්‌කේ කෙසේ ද යන ප්‍රශ්නය නම් මට ඇත. ගුරුත්වාකර්ෂණය කිසිවෙකුගේ වත් සංයුක්‌ත ප්‍රත්‍යක්‍ෂ දැනුමක්‌ නො වේ. එය දුටු කෙනකු නැත. අල්ලා බැලූ අයකු නැත. එයට සවන් දුන් අයකු, එහි රස දැනගත් අයකු, එහි ගඳ සුවඳ ද දන්නා අයකු නැත. එය නිව්ටන් විද්වතා නිර්මාණය කළ හුදු වියුක්‌ත සංකල්පයක්‌ පමණකි. එහෙත් ඇතැමුන්ට දෙවියන් යනු ප්‍රත්‍යක්‍ෂ දැනුමකි. දෙවියන් ප්‍රත්‍යක්‍ෂ වන්නේ එවැන්නන් ගේ මනසට යෑයි සිතමි. ඔවුන් දෙවියන් දකින්නේ මසැසින් නො වන බව පැහැදිලි ය. ඒ සඳහා පෙර භවවල දියුණු කරන ලද පාරමී ශක්‌තීන් හා කුසල ශක්‌තීන් අවශ්‍ය වෙයි. එසේත් නැත හොත් මේ භවයේ භාවනා කර ආධ්‍යාත්මික ශක්‌තිය දියුණු කරගත යුතු වෙයි. වත්මන් බටහිරයන්ට මේ ශක්‌තිය කෙතරම් දුරට ඇත් දැයි නො දනිමි. ඇතැම් විට ඔවුන්ට මිථ්‍යාදෘෂ්ටික දෙවිවරුන් ගෙන් දැනුම ලැබෙනවා විය හැකි ය. එහෙත් ඔවුන් සමාජයේ ඇති පොදු මතයට බියෙන් ඒ බව ප්‍රසිද්ධියේ නො කියනවා විය හැකි ය.

ඒ කෙසේ වෙතත් ඇතැම් පැරැණි යුදෙව්වන්ට ඒ ශක්‌තිය තිබුණු බව බයිබලයෙන් පැහැදිලි වෙයි. විවිධ අනාගත වක්‌තෘන් වහන්සේලා පමණක්‌ නො ව යුදෙව් වර්ගයාගේ ආදිතමයන් ලෙස සැලකෙන ඒබ්‍රහම් ආදීහු දෙවියන් සමඟ සංවාදයෙහි යෙදී ඇති බව පරණ තෙස්‌තමේන්තුවෙන් හෙළි වෙයි. එම පැරැණි යුදෙව්වන්ට කතා කළ ඔවුන් සමඟ සංවාදයෙහි යෙදුණු ප්‍රධාන දෙවියන් වී ඇත්තේ යෙහෝවා දෙවියන් බව පරණ තෙස්‌තමේන්තුවෙන් පැහැදිලි වෙයි. යුදෙව්වන් මේ යෙහෝවා දෙවියන් තමන් ගේ ගෝත්‍රයෙහි දෙවියන් ලෙස පිළිගෙන ඇත. එපමණක්‌ නො ව ඔවුහු එම දෙවියන් ලෝකය නිර්මාණය කළ දෙවියන් ලෙස ද සලකා ඇත.

බැප්ටිස්‌ට්‌ නමින් හැඳින්වෙන අනාගත වක්‌තෘවරයා දක්‌වා ම විවිධ යුදෙව්වන් මේ යෙහෝවා දෙවියන් සමඟ සම්බන්ධකම් පවත්වා ඇති බව පරණ තෙස්‌තමේන්තුවට අනුව අපට නිගමනය කළ හැකි ය. නොවා ඉන් එක්‌ වක්‌තෘන් කෙනෙකි. එසේ ම මේ අනාගත වක්‌තෘත් යෙහෝවා දෙවියන් ගෙන් ලත් දැනුම, විශේෂයෙන් ම අනාගතය පිළිබඳ දැනුම, අනෙක්‌ යුදෙව්වන්ට ප්‍රකාශ කර ඇත. නොවා නුදුරේ සිදු වන මහා ජල ගැලීමක්‌ ගැන සඳහන් කර එයින් ගැලවීමට සූදානම් වී ඇත. ඔහු ඇතුළු අනෙක්‌ අය අනාගත වක්‌තෘන් එසේත් නැත්නම් දිවැසිවරුන් ලෙස පිළිගැනීමට හේතු වී ඇත්තේත් ඔවුන්ට දෙවියන් ගේ ආධාරයෙන් අනාගතය කීමට යම් හැකියාවක්‌ තිබීම බව පැහැදිලි ය. මුස්‌ලිම් සම්ප්‍රදාය අනුවත් ඔවුහු අනාගත වක්‌තෘන් ලෙස පිළිගැනෙති. එපමණක්‌ නො ව ක්‍රිස්‌තුස්‌ වහන්සේ ද මුස්‌ලිම් සම්ප්‍රදායෙහි තවත් අනාගත වක්‌තෘන් කෙනකු පමණ ය.

මා දැන් තේරුම් ගන්නා ආකාරයට යුදෙව්වකු වූ ක්‍රිස්‌තුස්‌ වහන්සේ අනෙක්‌ යුදෙව් අනාගත වක්‌තෘන් ගෙන් වෙනස්‌ වන්නේ යුදෙව්වන්ට පමණක්‌ සීමා වී තිබූ යෙහෝවා දෙවියන් වහන්සේ අනෙක්‌ ජන වර්ගවල ද දෙවියන් වහන්සේ බවට පත් කිරීමට ගත් උත්සාහය හේතු කොටගෙන ය. එයට කලින් ද යුදෙව්වන් අනෙක්‌ දෙවිවරුන් ගේ පිළිම විනාශ කිරීමට කටයුතු කර ඇත. ක්‍රිස්‌තුස්‌ වහන්සේ ගෙන් පසුව යෙහෝවා දෙවියන් ලෝකයේ එක ම දෙවියන් වහන්සේ බවට පත් කිරීමට දැඩි උත්සාහයක්‌ ගනු ලැබිණි. එසේ පත් කිරීම ක්‍රිස්‌තුස්‌ වහන්සේට යෙහෝවා දෙවියන් නියම කර තිබූ කාර්යය යෑයි සිතිය හැකි ය. ක්‍රිස්‌තුස්‌ වහන්සේ ස්‌වර්ගයේ (යම් දිව්‍ය ලෝකයක) සිට මිනිස්‌ ලොවට යෙහෝවා දෙවියන් විසින් එවනු ලැබූ තවත් දෙවියකු විය හැකි ය. එසේත් නැත්නම් යෙහෝවා දෙවියන් ම මිනිස්‌ ලෝකයට පැමිණියා විය හැකි ය. ක්‍රිස්‌තුස්‌ වහන්සේ තමන් දෙවියන් වහන්සේ ගේ පුත්‍රයා බවත් තමන් දෙවියන් වහන්සේ බවත් යුදෙව්වන්ට ප්‍රකාශ කර ඇත්තේ තමන් මිනිස්‌ ලොව උපත ලැබූ යෙහෝවා දෙවියන් නිසා යෑයි අපට සිතාගත හැකි ය.

අපට වඩාත් ඒත්තු යන කතාව (මේ සියල්ල ම එක්‌ අතකින් කතන්දර වේ) නම් යෙහෝවා නම් දෙවි කෙනකු යුදෙව් ජනවර්ගයේ දෙවියන් ලෙස සිට ඇති බවත් ඒ දෙවියන් ඇතැම් යුදෙව්වවන් සමඟ දිගින් දිගට සම්බන්ධකම් පවත්වා ඇති බවත් ඒ දෙවියන් ගේ මාර්ගයෙන් යුදෙව්වන්ට ඇතැම් දැනුමක්‌ ලැබී ඇති බවත් දැනට අවුරුදු දෙ දහසකට පමණ පෙර යම් හේතුවක්‌ නිසා යෙහෝවා දෙවියන් බලවත් වී ඇති බවත් එතුමා තම ආධිපත්‍යය අනෙක්‌ ජනවර්ග සහිත මුළු ලෝකයට ම පැතිරවීම සඳහා මිනිස්‌ වෙසක්‌ ගෙන ක්‍රිස්‌තුස්‌ වහන්සේ නමින් මරියතුමිය ගේ කුසින් ලොවට බිහි වී ඇති බවත් ය. මා මෙලෙස පවසන්නේ විවිධ හේතු නිසා දෙව් ලොවින් චුත ව මිනිස්‌ වෙස්‌ගෙන ලංකාවේ උත්පත්තිය ලැබූ අය ගැන අප අසා ඇති නිසාත් බව අවධාරණය කළ යුතු ය.

මෙහි දී තවත් කරුණක්‌ සඳහන් කළ යුතු ව ඇත. බොහෝ විට දේව මණ්‌ඩල ඒ ඒ මණ්‌ඩලයේ ප්‍රධාන දෙවියන් නමින් නම් කෙරෙයි. එහෙත් ඒ ප්‍රධාන දෙවියන් කාලයෙන් කාලයට වෙනස්‌ වෙයි. උදාහරණයක්‌ වශයෙන් ගත හොත් නාථ දේව මණ්‌ඩලයේ ප්‍රධානියා නාථ දෙවියන් වන අතර ඒ පදවිය කාලයෙන් කාලයට විවිධ දෙවියන්ට අයත් වෙයි. කා හට අයත් වුව ද තමන් ප්‍රධානත්වය දරන කාලයෙහි ඒ දෙවියෝ මණ්‌ඩලයේ නාමයෙන් හැඳින්වෙති. අප දන්නා ආකාරයට නාථ දෙවියන් ලෙස දැනට කටයුතු කරන දෙවියන් එම ධුරයෙහි, එනම් නාථ දේව මණ්‌ඩලයෙහි ප්‍රධාන ධුරයෙහි කටයුතු කිරීමට පටන් ගෙන දැනට වසර කිහිපයකි.

බොහෝ විට යෙහෝවා දේව මණ්‌ඩලයෙහි ප්‍රධානියා බවට දැනට වසර දෙ දහසකට පමණ පෙර බලවත් මිථ්‍යාදෘෂ්ටික දෙවි කෙනකු පත් වන්නට ඇත. එසේත් නැත්නම් එවකට ප්‍රධානත්වය දැරූ අය බලවත් වන්නට ඇත. ඒ කෙසේ වෙතත් එතුමා යුදෙව්වන් පමණක්‌ තමන්ට අවනත ජනවර්ගය වීමෙන් සෑහීමට පත් නො වී සියලු ලෝ වැස්‌සන් බැරි නම් ඉතා වැඩි පිරිසක්‌ තම ග්‍රහණයට ගැනීම සඳහා යේසුස්‌ ක්‍රිස්‌තුස්‌ නමින් මිනිස්‌ වෙසක්‌ ගෙන මරියතුමිය ගේ කුසින් බිහි වන්නට ඇත. එසේ බිහි වීමෙන් අවුරුදු තිහකට පමණ පසු එතුමා තම ව්‍යාපාරය දියත් කර ඇති බව පෙනෙයි. ඉතා ම සාම්ප්‍රදායානුකූල ජනවර්ගයක්‌ වූ යුදෙව්වවන් ක්‍රිස්‌තුස්‌ වහන්සේට අකැමැති වීම පුදුමයක්‌ නො වේ. ඔවුහු රෝම පාලකයන් සමඟ එකතු වී ක්‍රිස්‌තුස්‌ වහන්සේ මරා දැමූ හ.

එහෙත් මිය ගිය ක්‍රිස්‌තුස්‌ වහන්සේ නැවත යෙහෝවා දේව මණ්‌ඩලයේ ප්‍රධානියා ලෙස ඉපිද මිනිසුන් ලවා නව ඉගැන්වීම පැතිරවීමට ක්‍රියා කරන්නට ඇතැයි සිතිය හැකි ය. ක්‍රිස්‌තු භක්‌තිකයන් ක්‍රිස්‌තුස්‌ වහන්සේ ගේ උත්ථාපනය ලෙස දකින්නේ මේ සිද්ධිය විය හැකි ය. පසු කලෙක කොන්ස්‌තන්තයින් රජු මගින් ද පසුව වෙනත් රජවරුන් හා පාප් වහන්සේලා මගින් ද යෙහෝවා දෙවියන් මිනිසුන් ගෙන් ඉතා වැඩි ප්‍රමාණයක්‌ තමන් ගේ ග්‍රහණයට ගැනීමට සමත් වී ඇති බව පැහැදිලි ය. එහෙත් පසුව පාප් වහන්සේලා තම කාර්යය නිසි ලෙස ඉටු නො කරන බව දුටු යෙහෝවා දෙවියන් ලූතර් කැල්වින් ආදීන් මගින් වෙනත් ක්‍රිස්‌තියානි නිකායන් බිහි කර ලෝක ආධිපත්‍යය තමන් වෙතට ගෙන ඇති බව පෙනී යයි. මෙයින් අදහස්‌ කරන්නේ සියල්ල දෙවියන් අතින් සිදු වන බව නො වේ. එහෙත් අප සිතනවාට වඩා මිනිස්‌ ලෝකයෙහි කටයුතුවලට දෙවියෝ මැදිහත් වෙති. පැරැණි වෛදික හා ගී්‍රක සාහිත්‍යවල මෙවැනි මැදිහත්වීම් ගැන සඳහන් වෙයි.

මහාචාර්ය නලින් ද සිල්වා